Балакаева Ляйля Тултаевна 1982 жылы әл-Фараби атындағы Қазақ ұлттық университетінің тарих факультетін (арнайы бөлім – ағылшын тілі) тәмамдады. 1984–1987 жылдары Ш.Ш. Уәлиханов атындағы Тарих және этнология институтының аспирантурасында білім алды. 1989 жылғы маусым айында 07.00.02 мамандығы бойынша кандидаттық диссертациясын қорғап, 1989 жылғы 23 маусымдағы шешіммен тарих ғылымдарының кандидаты ғылыми дәрежесіне ие болды (ИТ №014703). 1987–1999 жылдары аталған институтта ғылыми қызметкер және аға ғылыми қызметкер қызметтерін атқарды. 1996– 1999 жылдары институттың ғалым хатшысы болды. 1999 жылғы қыркүйектен 2008 жылғы маусымға дейін Абай атындағы Қазақ ұлттық педагогикалық университетінің жалпы тарих кафедрасында доцент қызметін атқарды. Шығыс тарихы бойынша негізгі пәндерден дәріс оқыды. 2000–2006 жылдары тарих факультеті кеңесінің ғалым хатшысы, сондай-ақ «Хабаршы» журналының «Тарих және әлеуметтік-саяси ғылымдар» сериясының жауапты хатшысы болды. 2008 жылғы сәуір айында ҚР Білім және ғылым министрлігінің Білім және ғылым саласындағы бақылау комитетінің шешімімен (диплом №0000550) «Тарих» мамандығы бойынша доцент ғылыми атағы берілді. 2008 жылғы қыркүйектен 2011 жылғы қыркүйекке дейін әл-Фараби атындағы ҚазҰУ жапонтану кафедрасының меңгерушісі, 2011–2014 жылдары кореистика және жапонтану кафедрасының меңгерушісі қызметін атқарды. 2014 жылғы қыркүйектен 2025 жылғы қыркүйекке дейін әл-Фараби атындағы ҚазҰУ Шығыстану факультеті Қиыр Шығыс кафедрасының доценті қызметін атқаруда. Л.Т. Балакаева ғылыми-зерттеу қызметімен белсенді айналысады. Қазіргі ғылыми бағыты — Жапонияның жаңа және қазіргі заман тарихы мәселелері. Отандық және шетелдік ғылыми басылымдарда 50-ден астам ғылыми мақала мен оқу құралдарының авторы.